ฮีตสิบสอง

ตกฤดูเดือนอ้าย สายลมมาหนาวหน่วง
เฮามาพากันค้ำ ทำบุญตักบาตร เดือนนี้ตกหว่างช่วง สังโฆเจ้าเพิ่นเข้ากรรม
ปริวาสซ่อยยู้ ซูค้ำศาสนา
ฮอดเดือนสองอย่าฟ้าวซ้า ข้าวใหม่ปลามัน
เชิญเจ้ามาโฮมเต้า อย่าพากันขี้ถี่ ให้เฮามาโฮมกัน แต่งบุญประทายข้าว
บุญคุณลานตั้งแต่กี้ พากันให้ฮักษา
ฮอดเดือนสามท้องฟ้า ปลอดโปร่งสดใส่
เหลียวเห็นซุมสาวน้อย พากันปั้นข้าวจี่
พ่องกะบีบข้าวปุ้น ตกแต่งอาหาร ไปทางใด๋เห็นแต่คนใจบุญ ซะแซวเป็นคุ้ม
เฮือนละสี่ห้าปั้น พอได้เข้าใส่บุญ
มีเทิงหวานและคาว หนุ่มสาวมาโฮมต้อม
ให้คอยซอมไปทางหน้า เดือนสิมาเป็นเดือนสี่
ขวางเขตบ้าน ย่านถิ่นดินอีสาน
ตกหว่างตอนคนตั้ง ใจฟังวอนวี่
มีเพียงปีละครั้ง ให้เฮาซ่อยกันสาน หลังจากบุญข้าวจี่ สิมีบุญพระเวสเจ้าเฮาสิได้แต่งทาน
สุขสำราญเหลือหลาย ม่วนมิ่งกะเลยต้อน
ตอนกัณหาชาลี สิพากพ่อแม่แก้วคนสิให้นั่งฟัง
จัดเป็นงานประเพณี ให้คนรุ่นหลังฮู้
ตกฤดูเดือนห้า สายลมบ่มาผ่าน
เดือนนี้บ่ได้ช้า ปีใหม่มาเถิง
เต่าสิถามหาบุ้น คนบุญสิมาปล่อย
เดือนนี้ม่วนจ้นๆ คนกะหลั่งมาหลาย เห็นแต่ดอกจาน บานแย้มเต็มทั่วท่งนา
ให้พากันทำบุญ ปล่อยปลาลงน้ำ
นกสิงอย ง่ายไม้คอยถ้าตั้งแต่ฝน
เอาพระทรายมากอง ก่อเป็นเจดีย์ไว้
ฮอดเดือนหกเสียงฟ้า ไขบอกข่าวทางคน
สายตามองเห็นแล้ว ในใจกะให้ม่วน
เห็นปลาข่าว ปลาซิวปลานิลปลากะเดิด
เดือนนี้เหมิดโทษฮ้าย บ่มีเรื่องเลิงหลง
เห็นแต่สิใส่เน้น วันเพ็ญสิบห้าค่ำ
ไผกะยิ้มเป้ยๆ ลงวัดเวียนเทียน มีแต่ฝนกับลม ส่งเสียงกึกก้อง
ส่วนว่าเขียดอีโม้ ลำเกี้ยวใส่ผู้สาว
แล่นหยอกล้อ กันเล่นเหลือหลาย
อัศดงดวงอาทิตย์ ค่ำลงปลายไม้
วิสาขะเลิศล้ำ ชาวบ้านบ่อยู่เสย
ได้เวียนมาเถิง นพคุณคลองเค้า
เดือนเจ็ดเผาความฮ้าย อันตรายบ่มาผ่าน
บุญสิมาซ่อยค้ำ ซูส่งราศรี
ตั้งแต่คนเฮาได้ เคยได้ยินแต่ปางก่อน นิมนต์พระขึ้นบ้าน เล็งเป้าเข้าสู่ธรรม
บารมีผลทาน สิไล่มารเลยพ้น
บุญชำฮะสละความเดือดฮ้อน เมืองบ้านสิซุมเย็น
จันทร์เพ็ญแจ้ง ทอแสงใสสง่า
เดือนนี้สงฆ์เพิ่นยั้ง เข้าอยู่จำพรรษา
เฮามาพากันเข้า ทำบุญพร้อมพร่ำ
เดือนแปดคล้อย เห็นลมทั่งใบเสียว
กบเพิ่นนอนคอยถ้า ฝนลงมาสิได้ม่วน เดือนแปดมาฮอดแล้ว สิแววขึ้นลึ่นหลัง
ภาวนาอบรม ข่มใจสู่แลงเช้า
ถวายผ้าอาบน้ำ ให้ยาท่านเพิ่นใช้สอย
เหลืยวเห็นฝูงปลาขาว แล่นมาโฮมต้อม
ลงเล่นน้ำ โซะซะซัวแซว
เดือนเก้ามาฮอดแล้ว บ้านป่าขาดอน
เถิงฤดูเดือนเก้า อีสานเฮาท้องถิ่น
พ้นจากมารหยาบฮ้าย พากันอยู่เป็นสุข
มีแต่สดใสจ้นๆ คนจนแสนม่วน
ขวางเขตบ้าน ย้านป่านาหวาย เห็นนกเขางอยคอน ส่งเสียงหาซู้
เคยได้ยินประดับดิน ทานฮอดทอดถวาย
โพยภัยทุกข์ อย่าผ่านผายมาใกล้
ต่างกะชวนพี่น้อง ลงโต้งแต่งทาน

เถิงเดือนสิบสิก่นมันมาต้ม
พ่องกะคนต่าน้อย ลงห้วยฮ่องนา
ข้าวสากลงไปวัด ให้หมู่สังโฆเจ้า
ซุบบักมี้ กะมาพร้อมพร่ำกัน พ่องกะงมกอข้าว หาเทากำลังอ่อน
เดือนนี้บ่ได้ช้า พากันแต่งทานถง
มีลาบเทา พร้อมหมกดักแด้ของดีคั่วกุดจี่

เดือนสิบเอ็ดว่านั้น หัวลมอ่วยโซยหนาวสาแล้ว
ได้ยินเสียงลมต้อง ปลายสำสาอยู่เวิ่นๆ
นกแจนแวนออกฮ้อง หาคู่ผสมพันธ์
ฝูงปลาขาวลงโฮมต้อน ผู้สาวนอนขึ้ค้านตื่น
ฟังเสียงฟ้าฮ้องตุ้ม เอิ้นสั่งฤดูฝน
เดิกออนซอนจันทร์ใสแจ้ง ทอแสงใสสง่า
บัดนี้แล้ววัดสิเป็นกำพร้า บ่มีพระสิมานอน
ได้ยินเสียงกลองโย้น วันเพ็ญสิบห้าค่ำ ยามผู้สาวสิขาลาย ผู้ชายสิขาเกลี้ยง
หมาจอกเอิ้นสั่งซู้ กะปูหม่นเข้าฝั่งหนอง
ควายบักเทิกตกมัน แล่ต่ำแต่ต่อพร้าว
ปลาดุกบื่นค่อนสิแจ้ง หันหน้าเข้าใส่หลุม
ฝูงหมู่คนลงเลาะ ไฮ่นาปลาข่อน
ออกพรรษาห่อข้าวต้ม ลมล่อแต่หมู่ปลา
มาออนซอนแต่ทายก ไล่แต่งัวเข้ามาเลี้ยง
พระสิลาแม่ออกค้ำ ไตรมาสสิสั่งลา
เหลียวขึ้นเบิ่งท้องฟ้า เห็นแต่ว่าวเดือนสิบสอง
พอสมควรหาผ้า กฐินทานมาทอด ลมคะนองโชยพัด งายงมกะเลยมั่น
ตลอดเดือนหนึ่งพุ้น หาได้ดั่งประสงค์

Read more »

เฮือน 3 น้ำ 4

 

เฮือน 3 น้ำ 4 เป็นคำสอนของคนโบราณอีสานได้อบรมสั่งสอนให้ลูกหลานได้ประพฤติปฏิบัติ เพื่อความเป็นอยู่ที่สะอาด สุขภาพอนามัยที่ดี ผู้ใดนำไปประพฤติปฏิบัติครอบครัวก็จะอยู่เย็นเป็นสุข ซึ่งปราชญ์โบราณท่านได้สอนเป็นคำกลอนดังนี้

เฮือน 1 นั้นได้แก่ เฮือนครัว ของในครัวให้เรียบร้อยบายเมี้ยนแจบจม อย่าประสมประเสบ่วงจองไหหม้อ ให้มีทอเก็บถ้วยสวยดีมีตู้ใส่ อย่าสุเก็บไขว่ไว้ดูได้บ่งาม ชามหรือหม้อเกลือไหปลาแดก หม้อแตกและบ่วงซ้อนบายได้ให้หม่อมือ อย่าให้ดำปื้อๆ ถ้วยบ่วงเป็นกะหลืน เวลากลืนอาหารโรคสิไหลลงท้อง ของแนวใช้ในครัวให้เกลี้ยงหมื่น อย่าให้ปลาแดกจื้นแมงวันสิแตกวื้นมาขี้ใส่ครัว อย่าให้หมาไก่กั้วเข้าอยู่เฮือนไฟ ถืกห่าหมาจังไฮสิคาบไหเลียซ้อน อย่าให้หนอนไปคั้วแมงวันเข้าคั่ว รักษาครัวให้เรียบร้อยดูละห้อยสู่ทาง อย่าให้มีกระดูกก้างค้างอยู่ในครัว คนสิหัวขวนนางว่าบ่เคยบายเมี้ยน เฮาต้องเพียรปัดแพ้วเฮือนครัวอย่าให้เก่า เป็นดั่งคำเพิ่นเว้า เบิ่งวัดให้เบิ่งฐานเบิ่งบ้านให้เบิ่งครัว หากว่าครัวสะอาดแล้ว ไผก็ย่องว่าดี

เฮือน 2 นั้นได้แก่ เฮือนนอน ทั้งแพรหมอนเสื่อเตียงเพียงพื้น อย่าให้เฮือนเอาจื้นหมองมัวลั้วขี้ฝุ่น เฮาต้องปุนกวาดแผ้วทั้งพื้นนอกใน ให้เจ้าปัดหาดไว้เกลี้ยงหมื่นงามตา ทั้งแจฝานอกในใสเกลี้ยง เตียงหมอนมุ้งสนานอนฟูกเสื่อ เสื้อและผ้าบายเมี้ยนคล่องมือ ให้เจ้าเฮ็ดคู่มื้อปัดกวาดเฮือนนอน ตอนกลางคืนให้แต่งแปลงหมอนมุ้ง อย่าให้ผัวเฮายุ่งยามแลงแต่งบ่อน นอนตื่นแล้วบายเมี้ยนเช็ดถู โต๊ะตั่งตู้อย่าให้ไขว่เกะกะ อย่าให้ของเฮาซะทั่วเฮือนเบียนด้ง ให้เจ้าจงใจเมี้ยนเฮือนนอนให้สง่า สะอาดหูสะอาดตาหาอันใดกะได้ เวลาหายกะฮู้เวลาดูกะโก้เป็นน่านั่งนอน จ่อและแค่งม้อนอย่าให้กีดขวางเฮือน บุง เบียน เขิง ตาทอ บอเมี้ยน อย่าสิได้เอาสิ่นไปวางเทิงหัวบ่อน ผัวสินอนบ่ได้สิสูนขึ้นหยั่งคืน ของต่ำพื้นอย่าไปพาดเทิงหัว มันสิผิดครองคูบ่แม่นแนวเด้เจ้า ให้เจ้าเอาใจเมี้ยนจัดเฮือนนอนให้เป็นบ่อน จังสินอนฮอดแจ้งสิแฝงซอดเซ้าคันเจ้าแต่งดี

เฮือน 3 นั้นได้แก่ เฮือนกาย ให้มีความละอายอย่าสิป๋านมโต้น คนสิเห็นผางฮ้ายเฮือนกายน้องฮั่ว รักษากายให้กุ้มกายหุ้มห่อแพร เสื้อกะอย่าสิแก้ปะปล่อยไว้หลาย ให้รักษาเฮือนกายอย่าให้เฮือนเฮาฮ้าง ให้เจ้าปุนปองล้างเฮือนกายให้สะส่วย ให้มันสวยอยู่เรื่อยดูได้สู่ยาม ให้เจ้าหมั่นอาบน้ำชำระตนโต หัวของนางให้หมั่นสระสรงน้ำ ให้มันงามเหลือล้ำดำดีอยู่คือเก่า ผมให้งามฮอดเฒ่าหวีเรื่อยอย่าเซา อย่าว่าเป็นผู้เฒ่าขายขาดมีผัว ปะให้หัวแดงหยองกะบ่งามเด้เจ้า ว่าโตมีผัวแล้วบ่สระหัวจักเถื่อ เกิดขี้คร้านนุ่งเสื้อแนวนั้นบ่ดี ครั้นพิถีพิถันไว้รักษากายให้โก้คล่อง ผัวกะมองอยู่เรื่อยเห็นหน้ากะว่างาม เฮือน 3 นี้ นารีควรฮ่ำ ธรรม 3 ข้อนี้ จำไว้อย่าหลง

น้ำ 4 นั้นให้หมั่นเพียรทำ จำคำสอนฮ่ำฮอนเด้อเจ้า

น้ำ 1 นั้นแม่น น้ำอาบสรงศรี อย่าให้มีทางอึดให้หมั่นหามาไว้ เมื่อเวลาเฮาใช้สระสีล้างส่วย อย่าให้มวยขาดแห้ง อย่าให้แอ่งขาดเกลี้ยง เมืองบ้านสิกล่าวขวัญ

น้ำ 2 นั้นแม่น น้ำดื่มเฮากิน ขอให้ยินดีหาใส่เติมเต็มไว้ รักษาไห หรือหม้อ ถัง ออม อุแอ่ง อย่าให้แมงง้องแง้งลงเล่นแอ่งกิน ขัดให้เกลี้ยงอย่าให้เกิดมีไคล ดูให้ใสซอนแลนแอ่งกินดูเกลี้ยง อย่าให้มีกะหลึนเหมี่ยงสนิมไคลใต้ก้นแอ่ง อย่าให้น้ำขอดแห้งแลงเช้าให้เกื่อยขน ก้นแอ่งน้ำอย่าให้เกิดมีตม อย่าให้มีแนวจมอยู่เนาในน้ำ อย่าให้ไผเอาข้าว ของไปหว่านใส่ บาดมันไข่พุขึ้นสิปานน้ำฮากหมา ให้รักษาแอ่งน้ำยามดื่มอย่ามีอึด คึดอยากกินยามใด๋ก็เล่าตักกินได้ มีแขกไปไทยค้าคนมาเซาแหว่ ก็ได้แวใส่ได้เอาน้ำรับรอง

น้ำ 3 นั้นได้แก่ น้ำเต้าปูน ผู้ที่เป็นแม่เฮือนให้เหล่าหามาพร้อม ให้คอยดอมเด้อหล่า หาปูนใส่กระบอก อย่าให้ซอกขาดแห้งหาไว้ใส่ขัน พันพลูพร้อมพันยาไว้ถ้าพี่ พันดีๆ ให้เรียบร้อยคอยต้อนแขกคน

น้ำ 4 นั้นแม่น น้ำกลั่นอมฤต คือน้ำจิตน้ำใจแห่งนางหนูน้อย ให้เจ้าคอยหาน้ำในใจใสแจ่ม เพียงดั่งน้ำเต้าแก้วใสแล้วบ่ขุ่นมัว อย่าให้มีหมองมัว ผัวว่าอย่าโกรธา รักษาน้ำใจดีอย่าให้มีแข็งกระด้าง ขอให้นางคานน้อยใจดีอยู่อ่องต่อง คือดั่งน้ำหมากพร้าวบ่มีเปื้อนแปดตม อย่าให้มีคำขมต่อไผพอน้อย อย่าได้คอยหาข้องอแงฮ้อยแง่ เคียดข่อหล่อแข่แหล่แนวนั้นบ่ดี คันเฮ็ดได้จั่งสี้สิมีแต่ความสุข ผัวกะสุขเมียกะสุขสิค่อยมีเงินล้าน ผัวกะหวานเมียกะอ้อยออยกันเข้าบ่อน เมียกะนอนอยู่ใกล้ผัวได้ผ่างพา ขอให้นางคานหล้าทำตามโบราณเก่า จังสิมีขึ้นได้ความไฮ้บ่แล่นเถิง

ถ้าผู้ใดนำไปประพฤติปฏิบัติจักมีชีวิตที่รุ่งเรือง แม้ว่าบางสิ่งจะพ้นสมัยไปแล้วแต่เราก็ยังสามารถประยุกต์นำมาใช้ได้เสมอ อย่าพึ่งไปคิดว่านี่เป็นของโบราณไม่เห็นจะต้องไปตักหาบน้ำหรือเตรียมเต้าปูนกินหมากแต่อย่างใด เราก็ยังสามารถประยุกต์ของใหม่ให้รับกับคำสอนของเก่าได้อยู่มิใช่หรือ?

Read more »

มงคลคำสอนอีสาน38

มงฺคลํ อุตฺตมํ เสฏฐํ อันว่ามงคลนั้นความอุดมความประเสริฐ
พุทธองค์ทรงเทศน์ไว้ให้เฮาได้ฮ่ำเพิง
อเสวนา จ พาลานํ อย่าได้ไปอยู่ใกล้ เป็นหมู่กับคนพาลแม่ใหญ่เอ๋ย
ชาติแต่แนวบ่ดีให้หลีกใกล้หนีเว้น
ปณฺฑิตานญฺ จ เสวนา นั้น ชาติเมธาเซื้อบัณฑิตตนนักปราชญ์
ผู้ฉลาดฮอบฮู้ให้เอาเก่อกล่อมสหายพี่น้องเอย
ปูชา จ ปูชนียานํ คนดีนั้นควรบูชาเอาแบบอย่าง หย่างตามหลังผู้จั่งซั่น มีแต่ได้สิบ่เสีย
ปฏิรูปเทสวาโส อยู่ในเขตประเทศที่สมบูรณ์ ทั้งบุคคลและสิ่งของ ล้วนแต่แนวดีพร้อม
ปุพฺเพ จ กตปุญญตา บุญคุณสร้างบารมีพร้อมพร่ำ ทำแต่ดีจั่ย ๆ ไผบ่หย่องกะซางตาม........
อตฺตสมฺมาปณิธิ จ ตั้งตนไว้หมั่นเที่ยงในความดี บ่มีใจเอนเอียงหวั่นไหวไปทางฮ้าย
ไผสิติทั้งค้ายทั้งเมืองกะบ่เงี่ยง มีแต่ตั้งเที่ยงไว้บ่ไลถิ่มฝ่ายดี พ่อใหญ่แม่ใหญ่เอย...
พหุสจฺจญฺจ นี้ ได้เฮียนฮ่ำมาหลายซั่นแหล๋ว ได้สดับรับฟังใส่ใจอยู่เลิงเรื่อย
สิปฺปญฺจ พร้อม มีศิลปะศาสตร์ มีวิชาชีพครบถ้วน ชำนาญพร้อมสู่ภาย
วินโย จ สุกฺขิโต นั้นเพิ่นบอกว่าวินัยดี ได้ฝึกฝนอบรมตน ระเบียบงามมวลพร้อม
สุภาสิตา จ ยา วาจา อันว่าความขานเว้ามีคุณธรรมล่ำค่า
เป็นของฝากจากลุ่มฟ้ามาต้อนต่อนสะเหน พ่อใหญ่แม่ใหญ่เอย....
มาตาปิตุอุปฏฺฐานํ บรบัติเลี้ยงพ่อแม่ของเฮา อย่าได้เฮ็ดทำแนวขวาง ให้เพิ่นเคืองคำฮ้อน
อย่าได้วาจาเว้าให้สองเขือน้ำตาหลั่ง บาปท่อฟ้าเวรกล้ำท่อแผ่นดินพุ้นแหล๋ว
 
 
ปุตฺตทารสฺส สงฺคโห มีลูกเต้าให้แอบแต่ทางที่ดี อย่าได้ฝึกเอาแต่ใจต่ำไปมันสิยาก
ตามแต่ใจเลิงเรื่อยภายลุนสิสอนยาก บอกบ่ได้เมื่อหน้าสิบ่ดี
อนากุลา จ กมฺมนฺตา การงานค้างอากูรบ่แล้วทั่ว ของมันพอสิแล้วอย่าป๋าไว้ให้ยากมือ
ทานํ นั้นให้เจ้าแต่งแปลงทาน ฝึกหัดจิตใจให้ปล่อยวางอยู่เลิงเรื่อย
ธมฺมจริยา จ นั้นเจ้าอย่าได้ไลลาเว้น คลองธรรมพระเจ้ากล่าว ทุกค่ำเช้าให้เฮียนฮู้เฮ็ดนำ
ทุกค่ำเช้าให้ตั้งอยู่ในธรรม สุจริตซื่อตรงซั่วซีวันเมี้ยน
ญาตกานญฺจ สงฺคโห นั้น อย่าพากันขี่ถี่ พุ้นแม่นพี่นี้แม่นน้อง ปองดองฮักแก่น
ถึงยามทุกข์ยากแค้นให้เพียรซ่วนซอยกัน อ้ายน้องเอย...
อนวชฺชานิ กมฺมานิ เวียกเฮ็ดสร้างบ่ให้มีโทษกับไผ กิจขัดงามโทษบ่มีพอน้อย
อารตี วิรตี ปาปา นั้น บ่มีกรรมสร้างก่อ บาปท่อก้อยเพียรเว้นหลีกไกล
มชฺชปานา จ สญฺญโม ของเมานั้นมีโทษนานา สารพันบ่ฮอนหามากิน สูบดมอมเคี้ยว
มันสิพาเฮาล่มตกจมเป็นทาส ออกบ่ได้กะผองเฒ่าแก่ตาย
อปฺปมาโท จ ธมฺเมสุ ตั้งใจหมั่นบ่ประมาทเผลอเลอ มีสติอยู่สู่ยามมวลพร้อม
ถนอมใจไว้ในครองพุทโธวาท บ่ประมาทท่อก้อย ธรรมพระเจ้าเพิ่นสั่งสอน
คารโว นั้น ให้เจ้าฮู้จักอ่อนน้อมเคารพย่ำแยง แสดงถึงกิริยาบอกค่าคุณควรฮู้
บุคคลพร้อมกิจการต่าง ๆ ฮู้จักคุณค่าพร้อมถนอมไว้สู่ภาย ออกจากหั่น มีคำว่า
 
 
นิวาโต อย่าได้โว ๆ เสียงเหลื่อนทั้งค้าย
ให้เจ้ายอมือไหว้แสดงความนบนอบ หมอบ ๆ เข้าหัวสิเท้าง่ายางอ้ายน้องเอย.....
สนฺตุฏฺฐี นั้น ให้มีความสันโดษ อย่าสิโพดแต่ยากได้ จนทำให้ฮ่วนเฮ
ให้เจ้าพอใจพร้อมในสิ่งที่เฮามี ให้มีความยินดีแต่สิ่งของที่เฮาได้
มันสิพาทำให้จิตใจเฮาม่วนซื่น สุขยิ่งล้ำธรรมฮ้อนบ่ฮ่อนมี นอกจากนี้ยังมีคำว่า
กตญฺญุตา ให้ฮู้จักบุญคุณ อย่าได้ลืมไลหลีกเว้น
ชื่อว่าความดีนั้นกตัญญูเป็นเครื่องบอก นอกจากนี้บ่เหลือไว้ให้ส่วนดี ต่อจากนี้มีคำว่าเป็นคาถา
กาเลน ธมฺมสฺสวนํ ให้หายามฟังธรรม ขูดเกาสนิมฮ้าย
ในหัวใจเฮาหมองเศร้า หย่อนว่าเฮาบ่ฉลาด บ่อาจสุขอยู่ล้วน สนิมหุ่มห่อใจเจ้าเอย
เอตมฺมงฺคลมุตฺตมํ อันนี้แหล๋วคือมงคลแท้ แนวอุดมทั้งประเสริฐ
บ่มีไผสิมาส่งให้เสริมให้เฮาได้ดังกล่าวขานพี่น้องเอย....
มีแต่เขามาต้ม ตั่วเอาเงินคนโง่ พาโลหลอกพี่น้อง ได้กินแล้วกะแซวกะแซวหนีซั่นแหล๋ว...
เขาพุ้นตี๋เป็นผู้ได้ ทั้งเสน่ห์ทั้งมงคล ได้ทั้งเงินทั้งทองของขาว แล้วหอบคืนเมือบ้าน
เป็นต๋ะสงสารหน้า อวิชชามาหุ่มห่อไทยเฮานอ ซางมาตั่วหลอกล้อ บ่กลัวหย้านบาปเวรแท้แหล๋ว....
ขนฺติ จ ว่านั้น เพิ่นบอกว่าให้อดทน ทั้งการงานหนักเบาแดดฝนให้ทนกลั้น
ทนทั้งกายใจพร้อมขมเข็มเคียดด่า หวานและส้มให้ชวนชมได้สู่ภายพี่น้องเอย.....
 
โสวจสฺสตา นั้นให้เจ้าเป็นคนเว้าง่าย อย่าได้เฮ็ดอึ่งตึ่งคือหม้อบ่สาง
สมณานญฺจ ทสฺสนํ การได้เห็นได้ใกล้กับท่านผู้มีศีล ผู้สงบกายใจเฮ็ดให้เฮาหายฮ้อน
กาเลน ธมฺมสากจฺฉา นั้น สนทนาในเรื่องดีงามตามโอกาส เฮ็ดให้เฮาฉลาดฮู้ในเรื่องที่กล่าวจา
เอตมฺมงฺคลมุตฺตมํ อันนี้แหล๋วคือมงคลอันประเสริฐ ให้เจ้าจำจื่อไว้ธรรมพระเจ้าสั่งสอนท่านเอย....
อีกอันหนึ่งคาถาว่า ตโป จ ให้เจ้ามีความเพียรแผดเผาอูดรนความฮ้าย
บังคับกายใจพร้อมบ่ตามใจมวลกิเลส อันนี้วิเศษแท้จำไว้อย่าสิลืม
พรฺหมฺจริยญฺจ พร้อม ให้เจ้าประพฤติพรหมจรรย์ ฮู้ควบคุมทางกายระหว่างยามที่ควรเว้น
ทำตนให้เป็นคนผู้ประเสริฐ เฮ็ดจั่งซั่นเขาสิเอิ้นว่าพรหม
อริยสจฺจานทสฺสนํ ความจริงแท้อยู่เหนือผลเหนือเหตุ เห็นแจ่มแจ้งจริงแท้สู่อัน
ฮู้ว่าทุกข์แท้ พร้อมทั้งเหตุของมัน ฮู้อาการของความดับ มอดลงของความฮ้อน
ฮู้จักถอนตนขึ้นตามทางอันประเสริฐ อันนี้เลิศแท้ ๆ จบสิ้นบาปเวร พ่อใหญ่แม่ใหญ่เอย...
นิพฺพานสจฺฉิกิริยา เฮ็ดนิพพานให้แจ้งคือความทุกข์มันดับหาย
อยู่เหนือตายเหนือเป็นบาปเวรจบสิ้น อยู่เหนือดินเหนือฟ้าเหนือดาราน้อยใหญ่
มอดดวงไฟที่ลุกไหม้ในใจเจ้าสิอยู่เย็น บ่แม่นนิพพานเล่น ๆ ที่เขามาหลอกเอาเงิน
ว่าสิพาไปทัวเมืองนิพพาน สู่สถานเมืองแก้ว โอ้ย....แวววาวเหลื่อมตามตายแต่ทางนอก ซอกแซกซอนหนอนน้อยหม่นอยู่ในพ่อใหญ่เอย...

ต่อไปฮั่นเพิ่นเอิ้นว่า ผุฏฺฐสฺส โลกธมฺเมหิ จิตฺตํ ยสฺส น กมฺปติ
บ่มีใจเอี่ยนโอนหวั่นไหว ต่อคำยอหย่อง นินทาพร้อมสรรเสริญกะคือเก่า
บ่มีหมองหม่นเศร้า เสมอด้ามดังแผ่นดิน
อโสกํ ว่านั้นจิตบ่มีโสกี มีแต่ความสงบเย็นอยู่เหนือความเศร้า
วิรชํ พร้อมจิตบ่มอมเกือกขี้ฝุ่น มีแต่ใสจั่งแก้วเบิดแล้วขี้ฝุ่นใจ
เขมํ ซ่ำ จิตอยู่เกษมสรร เบิดปัญหาชีวิตยอดมงคลแท้
ความเพิ่นวาจาต้านขานลงโค้งอ่วย ว่า
เอตาทิสานิ กตฺวา สพฺพตฺถมปราชิตา สพฺพโสตฺถึ คจฺฉนฺติ ตนฺเตสํ มงฺคลมุตฺตมนฺติ .
นรชนพร้อมฝูงหมู่เทวา ให้เฮ็ดนำทำตามที่ว่ามาเบิดเกลี้ยง
ย่อมบ่มีสูญเสี่ยงอัปปราชัยไปทุกที่ ความสวัสดีเที่ยงแท้ มงคลพร้อมทุกสถานอ้ายน้องเอย............

Read more »

ประมวลคำผญาอวยพรแก่บุคคลต่างๆ

 

 

                          คำอวยพรสำหรับข้าราชการชาย
……………………………
ชีวิตต่อแต่นี้ให่มีตั้งแต่ความสุข              อันหมู่มวลความทุกข์ อย่าสิมีมาใกล้
อันหมู่โรคาไข่ หวัดไอให่ไกลห่าง           ได้พบทางก้าวหน่า เจริญขึ่นบ่ถอย
เป็นผู้บ่าวส่ำน้อย ห่าร้อยปีหูยังดีคือเก่า    บ่มีวันแก่เถ่า ผู้สาวหุ่มฮักแพง
ความแข็งแรงคงมั่น บ่มีวันแปรเปลี่ยน      จนเกษียณร้อยครั้ง ยังหนุ่มฟ้อหร่อดังฝัน
อายุยืนยาวมั่นพันปีศรีสง่า                      สุขอยู่ในใต้หล้ามาโฮมเจ้าสู่วัน
นอนหลับนั้นได้เงินพันเงินหมื่น              ตื่นขึ่นได้เงินเต็มห้องทองเต็มบ้าน เด้อ…สาธุ
……………………………
                               คำอวยพรสำหรับข้าราชการหญิง
……………………………
ชีวิตต่อแต่นี้ให่มีตั้งแต่ความสุข                 อันหมู่มวลความทุกข์ ให่ห่างไกลพันลี้
โชคดีให่หลั่งเข่า โภยภัยให่ไกลห่าง          ได้พบทางก้าวหน่า เจริญขึ่นบ่ถอย
เป็นผู้สาวส่ำน้อย ห่าร้อยปีกะยังสวยคือเก่า บ่มีวันแก่เถ่า ผู้บ่าวหุ่มฮักแพง
ความแข็งแรงคงมั่น บ่มีวันแปรเปลี่ยน         จนเกษียณร้อยครั้ง ยังเซ็กซี่สวยดังฝัน
อายุยืนยาวมั่นพันปีศรีสง่า                         สุขอยู่ในใต้หล้ามาโฮมเจ้าสู่วัน
นอนหลับนั้นได้เงินพันเงินหมื่น                ตื่นขึ่นได้เงิน เงิน เงิน และทอง เด้อ…สาธุ
……………………………
                                                  คำอวยพรแวลาผูกแขน
……………………………
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี ฝ่ายเส่นนี้ เป็นฝ่ายที่ศักดิ์สิทธิ์          ผูกแขนแล้วสิมีฤทธิ์ฮูงเฮืองไปหน่า
อันหมู่โรคาไข่ หวัดไอบ่มาผ่า                         พบแต่ทางก้าวหน่าเจริญขึ่นดังฝัน
นอนหลับนั้นได้เงินพันเงินหมื่น                      ตื่นขึ่นได้ เงิน เงิน เงิน และทอง
โอม อุ อะ มุ มะ มูลมา สะทา โสตถี ภะวันตุ เต…โอม…. จึก จึก จึก …..เพี้ยง
…………………………… 
                                  

                                               อวยพรผูกแขนเจ้าบ่าว
…………………………..
ฮ้ายกวาดหนี ฮ้ายกวาดหนี ฮ้ายกวาดหนี      ดีกวาดเข่า ดีกวาดเข่า ดีกวาดเข่า ขวัญเจ้าหลั่งมาโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์   ปันลงมาให่ผู่ข่าผูกแขนเจ้าบ่าว เพิ่นได้แต่งงานกับเจ้าสาวในมื้อน้ี
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี   มีสุขภาพดีแข็งแรง พ่อเถ่าแม่เถ่าฮักแพงคือลูกคือหลาน
พี่น้องบริวารฮักแพงแห่ล้อม เมียอ่อนน้อมเอาอ้กเอาใจ   ได้ลูกชายหญิงดังที่เจ้าปรารถนา การงานให่ก้าวหน่า
การค้าให้ฮูงเฮือง การเมืองให่ลือลั่น การบ้านให่ขยัน    ผิวพรรณให่ผ่องใส ให้เจ้าฮ่างเจ้ามี ให่เจ้าได้เป็นเศรษฐี
เป็นมหาเศรษฐี เป็นลูกเขยที่ดี เป็นผัวที่ดี เป็นพ่อที่ดี เด้อ  ปสิทธิ เตโช ปสิทธิ มังคะโล มหาชัยโย…. เพี้ยง
……………………….
                                                  คำอวยพรผูกแขนเจ้าสาว
…………………………..
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์ ปันลงมาให่ผู่ข่าผูกแขนเจ้าสาวในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี   มีสุขภาพดีแข็งแรง ปู่ย่าฮักแพงคือลูกคือหลาน
พี่น้องบริวารฮักแพงแห่ล้อม ผัวอ่อนน้อมเอาอ้กเอาใจ  ได้ลูกชายหญิงดังที่เจ้าปรารถนา การงานให่ก้าวหน่า
การค้าให้เจริญ การเงินให่ลือลั่น การบ้านให่ซอยกัน  ผิวพรรณให่ผ่องใส ให้เจ้าฮ่างเจ้ามี เป็นลูกสะใภ้ที่ดีของปู่ย่า
เป็นที่เพิงพาของพี่น้อง ป้า ลุง ลูก หลานสู่คน เด้อ  จัตตาโร ธัมมา วัฒทันติ อายุ วัณโณ สุขัง พะลัง…. เพี้ยง
…………………………….
                                          คำอวยพรผูกแขนลูกหลาน
………………………………
ฮ้ายกวาดหนี ฮ้ายกวาดหนี ฮ้ายกวาดหนี    ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์  ปันลงมาให่ผู่ข่าผูกแขนหลานในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี       มีสุขภาพดีแข็งแรง พ่อแม่ฮักแพงหลายบ่น้อย
พี่น้องซอยส่งเสริม การงานให่ก้าวหน้า        การศึกษาให่เฮืองฮูง ได้เกรดสูงสี่ล้วนดังที่เจ้าปรารถนา
ให้เจ้ามีอายุยืนยาว ผิวพรรณขาวอ่องต่อง     งามผุดผ่องส่องใส ไผเห็นกะฮักกะแพง
ให่เจ้าแข็งแรงบ่เจ็บบ่ไข้ พ่อแม่พี่น้องได้เพิงพา    จัตตาโร ธัมมา วัฒทันติ อายุ วัณโณ สุขัง พะลัง
โอม สะวาหิ โอม สะวาหะ โอม ตุ ตะ ตุ ตะ ..เพี้ยง
……………………………..
                                                คำอวยพรผูกแขนผู้สูงอายุชาย
………………………………
ฮ้ายกวาดหนี ฮ้ายกวาดหนี ฮ้ายกวาดหนี    ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์  ปันลงมาให่ข่อยผูกแขนพ่อใหญ่……ในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่ดีมีแฮง    นอนหลับได้เงินพัน นอนฝันได้เงินหมื่น
นอนตื่นได้เงินแสน แบนมือไปได้เงินล้าน                    ออกนอกบ้าน พ้อห่องอาหารรีสอร์ต
มีผู้สาวมาหุ่มกอด ไปนวดหลังนวดแอว                         ให่ม่วนซื่นโฮแซว บ่แก่บ่เถ่า
อยู่เป็นเจ้าโคตรหมู่วงศา                                             สมปรารถนาทุกสิ่งทุกประการ เด้อ
จัตตาโร ธัมมา วัฒทันติ อายุ วัณโณ สุขัง พะลัง
……………………………………
                                      คำอวยพรผูกแขนผู้สูงอายุหญิง
…………………………………..
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์ปันลงมาให่ข่อยผูกแขนแม่ใหญ่…ในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่ดีมีแฮง    นอนหลับได้เงินพัน นอนฝันได้เงินหมื่น
นอนตื่นได้เงินแสน แบนมือไปได้เงินล้าน        ออกนอกบ้านได้ไปวัดไปวา
ลูกหลานพาไปไหว้พระธาตุอาจารย์                 ให่เจ้าสุขสำราญแข็งแรงบ่แก่บ่เถ่า
อยู่เป็นเจ้าโคตรหมู่วงศา                                 สมปรารถนาทุกสิ่งทุกประการ เด้อ
จัตตาโร ธัมมา วัฒทันติ อายุ วัณโณ สุขัง พะลัง
……………………… 
                              

                                              อวยพรวันเกิด
…………………….
มื้อนี้วันเกิดเจ้า เอาพรชัยมาส่ง                  ประสงค์ใดขอให่ได้ สมด้ามดั่งหมาย
คันเจ้าคึดอยากได้ สรรพสิ่งเงินทอง           ให่หลั่งไหลมากอง เต็มห่องเฮือนของเจ้า
โชคดีให่หลั่งเข่า โพยภัยให่ไกลห่าง          พบแต่ทางก้าวหน่า นำพาเจ้าสุขสำบาย
อันหมู่โรคาไข่ หวัดไอไข่บ่สวง                  ปวดแข้งขาเจ็บส่วง ให่หายสิ้นสู่อัน
อายุยืนยาวมั่น สุขสำราญการเป็นอยู่           สมประสงค์สู่ด้าน ให่ฝันเจ้าเป็นความจริง เด้อ สาธุ
………………………………………………………….
                              อวยพรลา (ตลกโปกฮาคลายเครียดตอนเลิกอบรม)
…………………………………………………………
ขอลาเด้อทุกท่าน อาจารย์ใหญ่ ผอ.            ผู้มารอนั่งอบรม อยู่นำกันหลายวันแล้ว
ขอลาแนวซุมเชื้อ วิทยากรคนสวย/หร่อ        คงสิได้พบพ้อ กันแท้แน่นอน
หำยังแขวนอ้อนต้อน ขายังย่างไปเป็น         เอ็นยังแข็งคึกคัก แอวยังดีพอได้เด้า
สิบ่เซาทางสร่าง การศึกษาให่เฮืองฮูง ดอกนา   ความฮู้ได้เทือนี้ นำไปใช้ได้แน่นอน
จึงขออวยพรให่ ไชยโยสิทธิโชค                ถืกโฉลกทุกเรื่อง ภัยฮ้ายเจ้าอย่ามี
ให่เจ้าสุขีหมั่น เสมอมันเคือเก่า                   ผู้เถ่าเถ่าถ่าอยู่บ้าน ให่ของขึ่นจนออกแสง
เมือมื้อแลงให่เจ้าได้ เบิกถอยหลังฮอดสามสี่  โชคดีขี่ถืกหม่อง เงินทองลันหลั่งโฮม เด้อ สาธุ
………………………….
                                       อวยพรลางานบุญผ้าป่า
………………………..
ขอลาเด้อทุกท่าน ที่มางานบุญผ่าป่า         เทือมีงานปีหน่า จั่งมาพ้อพบกัน
ขอบพระคุณทุกท่าน ที่ดูแลเอาใจใส่           แนวใดแซบหาให่ ใจหมู่เจ้าจั่งแม่นดี
คันมีใจให่กันแล้ว แจ่วเกลือกะอร่อย            แม่นว่ามีลาบก้อย ซังแล้วบ่อยากเหลียว
ข้อยสิเทียวหาหมู่เจ้า เอาผ้าป่ามานำ          มาทำบุญนำกัน ผูกพันเป็นพี่น้อง
มาเป็นทองผืนแหน่น แผ่นเดียวกันหมั่นแก่น แม่นจากไปมื้อนี้ ปีหน่าสิต่าวมา
เถิงเวลาจากกันแล้ว ขออวยพรแถมส่ง         ประสงค์ใด๋ขอให่ได้ สมด้ามดังหมาย
ผู้ใดฮูปฮ่างฮ้าย ให่ส่วยหร่อละออตา            โชคลาภไหลหลั่งมา สู่วันบ่มีเว้น
ให่เจ้ามีเป็นได้ สมตั้งใจทุกสิ่งอย่าง             ผู้ที่เป็นหม่ายฮ้าง ได้แฟนฮู้ฮักจริง
ซุมบ่าวสาวใสซิ่ง ได้แฟนจริงสวยหร่อ         ซุมพ่อแม่พี่น้อง มีคู่แล้วให่หมั่นยืน
นอนหลับนั้น ได้เงินพันเงินหมื่น                 ตื่นขึ่นได้ เงิน เงิน เงิน และ เงิน เด้อ สาธุ
………………………..
                                            อวยพรให้คณะผ้าป่า

ขอบพระคุณทุกท่าน ที่มางานบุญผ่าป่า              อย่าลืมสัญญาที่ให่ไว้ ว่าปีหน่าเจ้าสิมา
ข่อยสิหาแนวกินไว้ มวลปูปลาปิ้งป่น                  แนวใดแซบขนมาไว้ แม่นไกลใกล้สิซอกหา
คันบ่ได้เห็นหน่า เจ้าบ่มาคือดังว่า                      ข่อยสินอนนั่งถ่า วิงวอนฟ้าให่หล่ำแยง
น้องคำแพงเอื้อยอ้าย ให่เมือดีอย่าลำบาก           ความทุกข์ยากอย่าสิใกล้ โพยภัยให่ห่างไกล
อันหมู่โรคาไข่ หวัดไอให่ไกลห่าง                       ทางชีวิตข่างหน่า ให่พานพ้อสุขสำบาย
โชคลาภให่ ไหลหลั่งมาโฮม                              สมกับความตั้งใจ สู่อันคือฝันเจ้า
ซุมบ่าวสาวได้แฟนฮู้ ฮักแพงบ่แหนงหน่าย           ผู้ที่เป็นหม่ายฮ้าง ได้แฟนฮู้ฮักจริง
มีคู่อิงแอบแล้ว ให่หมั่นยืนยาวยิ่ง                        สิ่งใดดีให่หลั่งเข้า สิ่งใดฮ้ายให่หลั่งหนี
ให่เจ้ามีเป็นได้ สมตั้งใจเจ้าสู่อย่าง                     เห็นทางมาวัดบ้านข่อย มาซอยสร้างอย่าสิลืม เด้อ

 

ข่าขอนบนอบไหว่ ประธานใหญ่ในงาน                  สุขสำราญสู่คน ที่สนใจมางานนี้

วันที่มีงานเลี้ยง สังสรรค์วันงานแต่ง                     น้องคำแพงฮักกันมั่น พัวพันไว้ด้วยฮักหลาย

ขอแสดงความดีใจด้วย เจ้าสาวสวยเจ้าบ่าวหล่อ     เหมาะสมกันกะด้อ ซ่างหาพ้อกะซ่างเป็น

ข่อยอยากเห็นหมู่เจ้า มีลูกหลานหลานเหลนหล่อน    ข่อยออนซอนล่วงหน่า ว่าลูกเจ้าต้องหล่อสวย

จึงขออวยพรให่ ได้มีเป็นทุกสิ่งอย่าง                       ตามที่หวังวาดไว้ สมใจเจ้าใฝ่ฝัน

มีลูกหลานไวฟ้าว เป็นบ่าวสาวเจ้าได้เพิง                ไทยบ้านได้ยอย่อง มวลพี่น้องได้เพิงพา

ให่เจ้ามีอายุมั่น ขวัญยืนยาวยิ่ง                               สิ่งใดดีใหลั่งเข่า สิ่งใดฮ้ายให่หลั่งหนี

เป็นเศรษฐีพันล้าน การงานให่ลุหลั่ง                      ย่างไปใสไทยบ้านหุ่ม แห่แหนเจ้าด้วยฮักแพง

ความแข็งแฮงคงมั่น บ่มีวันแปรเปลี่ยน                   ผิวนวนเนียนปานยังน้อย มีข่อยข่าซอยแฮง

ฮักแพงฮอดมื้อเฒ่า ดูแลกันฮอดมื้อแก่                   เป็นแม่ตู้พ่อตู้ ชูไม้เท้าซอยเดิน พุ้นหละเด้อ

 

ขอบพระคุณทุกท่าน ที่มางานบุญผ่าป่า                 อย่าลืมสัญญาที่ให่ไว้ ว่าปีหน่าเจ้าสิมา

ข่อยสิหาแนวกินไว้ มวลปูปลาปิ้งป่น                     แนวใดแซบขนมาไว้ แม่นไกลใกล้สิซอกหา

คันบ่ได้เห็นหน่า เจ้าบ่มาคือดังว่า                        ข่อยสินอนนั่งถ่า วิงวอนฟ้าให่หล่ำแยง

น้องคำแพงเอื้อยอ้าย ให่เมือดีอย่าลำบาก              ความทุกข์ยากอย่าสิใกล้ โพยภัยให่ห่างไกล

อันหมู่โรคาไข่ หวัดไอให่ไกลห่าง                         ทางชีวิตข่างหน่า ให่พานพ้อสุขสำบาย

โชคลาภให่ ไหลหลั่งมาโฮม                                สมกับความตั้งใจ สู่อันคือฝันเจ้า

ซุมบ่าวสาวได้แฟนฮู้ ฮักแพงบ่แหนงหน่าย            ผู้ที่เป็นหม่ายฮ้าง ได้แฟนฮู้ฮักจริง

มีคู่อิงแอบแล้ว ให่หมั่นยืนยาวยิ่ง                         สิ่งใดดีให่หลั่งเข้า สิ่งใดฮ้ายให่หลั่งหนี

ให่เจ้ามีเป็นได้ สมตั้งใจเจ้าสู่อย่าง                     เห็นทางมาวัดบ้านข่อย มาซอยสร้างอย่าสิลืม เด้อ

 

                                               คำอวยพรในวันเกิด
มื้อนี้วันเกิดเจ้า เอาพรชัยมาส่ง                      ประสงค์ใดขอให่ได้ สมด้ามดั่งหมาย

คันเจ้าคึดอยากได้ สรรพสิ่งเงินทอง               ให่หลั่งไหลมากอง เต็มห่องเฮือนของเจ้า

โชคดีให่หลั่งเข่า โพยภัยให่ไกลห่าง               พบแต่ทางก้าวหน่า นำพาเจ้าสุขสำบาย

อันหมู่โรคาไข่ หวัดไอไข่บ่สวง                        ปวดแข้งขาเจ็บส่วง ให่หายสิ้นสู่อัน

อายุยืนยาวมั่น สุขสำราญการเป็นอยู่                สมประสงค์สู่ด้าน ให่ฝันเจ้าเป็นความจริง เด้อ สาธุ

                             

                                             ผูกแขนหลาน

มา มา มา ให้เจ๊าหยับเข้ามาใกล้                    ใหญ่นะโมสิ๊ผูกแขน......พะนะ

ฮ้ายกวาดหนี ฮ้ายกวาดหนี ฮ้ายกวาดหนี        ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ

ศรี ศรี ศรี สิทธิพระพร บวรล้ำาเลิศ                ฝ้ายแก้วเกิดเมืองสวรรค์

ปันลงมาให่ผู่ข่าผูกแขนหลานในมื้อนี้วันนี้       มาเยอขวัญเอย ขวัญเจ้ามาฮอดแล้วให่เจ้าอยู่สวัสดี

มีสุขภาพดีแข็งแรง พ่อแม่ฮักแพงหลายบ่น้อย   พี่น้องซอยส่งเสริม การงานให่ก้าวหน้า

การศึกษาให่เฮืองฮูง                                     ได้เกรดสูงสี่ล้วนดังที่เจ้าปรารถนา

ให้เจ้ามีอายุยืนยาว ผิวพรรณขาวอ่องต่อง         งามผุดผ่องส่องใส ไผเห็นกะฮักกะแพง

ให่เจ้าแข็งแรงบ่เจ็บบ่ไข้ พ่อแม่พี่น้องได้เพิงพา   จัตตาโร ธัมมา วัฒทันติ อายุ วัณโณ สุขัง พะลัง

โอม สะวาหิ โอม สะวาหะ โอม ตุ ตะ ตุ ตะ ..เพี้ยง

                                                         อวยพรบ่าวสาว

มีเจ้าบ่าว กะต้องมีเจ้าสาว เอ๊าหยั๊บเข่ามา........ พี่น้อง...มาเด้อข๊วนเอ๊ยย

ฮ้ายกวาดหนี ฮ้ายกวาดหนี ฮ้ายกวาดหนี          ดีกวาดเข่าดีกวาดเข่า ดีกวาดเข่า ขวัญเจ้าให่หลั่งโฮม เด้อ

ศรี ศรี ศรี สิทธิพระพร บวรล้ำเลิศ ฝ้ายแก้วเกิดเมืองสวรรค์  ปันลงมาให่ผู่ข่าผูกแขนเจ้าสาวในมื้อนี้วันนี้

มาเยอขวัญเอย ขวัญเจ้ามาฮอดแล้วให่เจ้าอยู่สวัสดี    มีสุขภาพดีแข็งแรง ปู่ย่าฮักแพงคือลูกคือหลาน

พี่น้องบริวารฮักแพงแห่ล้อม ผัวอ่อนน้อมเอาอ้กเอาใจ  ได้ลูกชายหญิงดังที่เจ้าปรารถนา การงานให่ก้าวหน่า

การค้าให้เจริญ การเงินให่ลือลั่น การบ้านให่ซอยกัน  ผิวพรรณให่ผ่องใส ให้เจ้าฮ่างเจ้ามี เป็นลูกสะใภ้ที่ดีของปู่ย่า

เป็นที่เพิงพาของพี่น้อง ป้า ลุง ลูก หลานสู่คน เด้อ   จัตตาโร ธัมมา วัฒทันติ อายุ วัณโณ สุขัง พะลัง…. 

ฮ้ายกวาดหนี ฮ้ายกวาดหนี ฮ้ายกวาดหนี                 ดีกวาดเข่า ดีกวาดเข่า ดีกวาดเข่า ขวัญเจ้าหลั่งมาโฮม เด้อ

ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์    ปันลงมาให่ผู่ข่าผูกแขนเจ้าบ่าว เพิ่นได้แต่งงานกับเจ้าสาวในมื้อน้ี

มาเยอขวัญเอย ขวัญเจ้ามาฮอดแล้วให่เจ้าอยู่สวัสดี    มีสุขภาพดีแข็งแรง พ่อเถ่าแม่เถ่าฮักแพงคือลูกคือหลาน

พี่น้องบริวารฮักแพงแห่ล้อม เมียอ่อนน้อมเอาอ้กเอาใจ   ได้ลูกชายหญิงดังที่เจ้าปรารถนา การงานให่ก้าวหน่า

การค้าให้ฮูงเฮือง การเมืองให่ลือลั่น การบ้านให่ขยัน     ผิวพรรณให่ผ่องใส ให้เจ้าฮ่างเจ้ามี ให่เจ้าได้เป็นเศรษฐี

เป็นมหาเศรษฐี เป็นลูกเขยที่ดี เป็นผัวที่ดี เป็นพ่อที่ดี เด้อ    ปสิทธิ เตโช ปสิทธิ มังคะโล มหาชัยโย…. เพี้ยง

                                                            ปีใหม่
ปีเก่าเมิดไปแล้ว ปีใหม่ได้มาเถิง                                ขอพระอินทร์ผู้อยู่เทิง ดาวดึงส์เมืองฟ้า

ประทานพรลงมาให่ มนุษย์ในพื้นแผ่น                         ทั่วดินแดนโลกกว้าง ให่เนายั้งอยู่ดี

อย่าได้มีเหตุฮ้อน สรรพสิ่งอันใด                                โพยภัยหาย อย่าสิหวนเห็นพ้อ

ผู้ที่รอโชคเข่า วาสนาเสริมส่ง                                    สมประสงค์สู่ด้าน งานเงินพร้อมสู่อัน

ผู้ขี่คร้าน ให้พออยู่พอกิน                                          ผู้มีศีลมีธรรม ให่ฮ่างมีดีได้

ผู้ที่เจ็บป่วยไข่ ให่หายดีมีสุขยิ่ง                                สิ่งใดดีหลั่งเข่า โพยภัยฮ้ายให่ห่างไกล

ทุกคนมีเป็นได้ สมตั้งใจทุกสิ่งอย่าง                          ทางชีวิตปีใหม่นี้ สุขขีมั่นสู่คน เด้อ สาธุ

ปีใหม่นี่ ให่มันดี/กว่าปีเก่า                      เงินเข่าเฮือนมื้อละร้อย ปีใหม่ได้/มื้อละพัน

ฝันปีเก่านั้น ฝันบ่ดี/มีแต่ล่าย                   ฝันปีใหม่/ให่เห็นโตก้องย่อง ซื้อได้โลด/บ่ต้องแปล

แก่ปีเก่านั้น ปีใหม่ให่/เป็นบ่าวสาว            เมียเฮาเคยเป็นยักษ์ ปีใหม่กลาย/เป็นนางฟ้า

ผัวขี่ยาขี่เหล่า ให่เซากินเซาดื่ม              เคยยืมเงินผู้อื่นใช้ ปีใหม่ให่/เป็นเจ้ามือ

เมียให้ถือเงินได้ บ่เกินวัน/ละซาวบาท      ปีใหม่เมียให่เพิ่ม ยี่สิบบาท/บ่ต้องทอน เด้อ สาธุ ประหยัดซ่อยกัน

                                                ผญาอวยพร

ผญาอวยพร......เด้อพี่น้องให้เจ้าสุขอยู่ล้น ผลที่ก่อกรรมดี ให้อยู่แดงมีฮี ให้อยู่ดีมีแฮง บ่เปลี่ยนแปลงสุขนั้น อายุยืนยาวมั่น พันปีอย่าได้หล่า..มีเดชาเกียรติก้อง ให้คนย่องกล่าวขาม มีแต่หัวย่ามๆนามยศปรากฎไกล สุขสดใสบ่มีเหงา กว่าคนเขาทั้งค่าย พ้อแต่ดีบ่มีฮ้าย มาทำลายให้ม้างมุ่น ความเจ็บเป็นเอ็นอุ่น อย่าสิมีท่อกิ้น ให้หายสิ้น แก่ท่านเด้อ...

Read more »